«Kitabxana.az».-2008.-№2.-S.10-11.

Azərbaycan kitabxanaçıları “KRIM-2008” - konfransında

Gülşən Mehdiyeva,

Azərbaycan Turizm İnstitutunun kitabxana müdiri

Bu yaxınlarda Azərbaycan Krımda keçirilən ("Kitabxanalar və informasiya resursları müasir elm, mədəniyyət, təhsil və biznes aləmində") 15-ci Yubiley Beynəlxalq Konfrans və Sərgidə təmsil etmək üçün bir qrup kitabxana işçisi göndərmişdi.

Respublikanın Köçərli adına Respublika Uşaq Kitabxanasının direktoru Quliyeva Fizurə, Mədəniyyət və Turizm Nazirliyinin nümayəndəsi Samir Abbasov, Azərbaycan Respublikasının İşlər İdarəsinin Prezident Kitabxanasının aparıcı məsləhətçisi və şöbə müdiri Zakir İsmayılov, adı çəkilən kitabxananın məsləhətçi-proqramçısı Fərhad Əzizov, Azərbaycan Turizm İnstitutunun kitabxana müdiri Gülşən Mehdiyeva, Respublika Gənclər Kitabxanasının direktoru Tahir Köçəri, Gəncə Mərkəzi Kitabxanasının direktoru Elmira Əliyeva, Astara Mərkəzləşmiş Kitabxana Sisteminin direktoru Nazim Fərəməzov təmsil edirdilər. Qeyd etmək lazımdır ki, bu Konfrans 15 il ərzində hər il Krımın Sudak şəhərində keçirilir. Orada kitabxana, informasiya və kompüter mütəxəssisləri, nəşriyyat nümayəndələri və bir sıra əlaqəli təşkilatlar görüşüb zamanımızın aktual informasiya problemlərini müzakirə edirlər.

Hər il olduğu kimi, bu il də istisna olmadı. Konfransın açılışında Y. Şrayberqin məruzəsində müasir informasiya məkanının ən aktual və gündəmdə olan məsələləri ön sıraya çəkildi. Demək olar ki, bu məruzə konfransda müzakirəyə çıxarılan bütün sahələri özündə əks etdirmişdi. Məruzədə bütün kitabxanaçı, müəllif və naşirləri narahat edən müəllif hüquqları, "Open access", İnternet, "Google Scholar" və s. məsələlər haqqında Y. Şrayberq söhbət açdı və həmişə olduğu kimi bu məruzə slayd və qısa video çarxlarla müşayiət olunurdu.

Konfransa gəldikdə, demək olar ki, bu çox möhtəşəm bir forum idi. Burada bütün MDB, Afrika, Asiya, Avropa ölkələrinin nümayəndələri iştirak edirdilər. Bir neçə gün ərzində çox maraqlı və mühüm məsələlər ortaya qoyuldu və müzakirə edildi. Konfrans bir neçə seksiyadan ibarət idi: Kitabxana-İnformasiya sistemi və texnologiyaların tətbiqi, Elektron kitabxanalar, Ümumi informasiya və mədəniyyət məkanında kitabxana və muzeylər, Kitabxanaşünaslıq, biblioqrafiyaşünaslıq və kitabşünaslıq, Kitabxana kadrları, peşə və təhsil və s. Əfsuslar olsun ki, o seksiyaların işi üst-üstə düşdüyündən hamısında iştirak etmək qeyri-mümkün idi.

Bizim nümayəndəliyimizin iştirak etdiyi bir tədbir haqqında daha geniş danışmaq istərdim. Bu tədbir daimi fəaliyyət göstərən "Türk dünyasının kitabxana və muzeyləri: Qarşılıqlı əlaqə və əməkdaşlıq" seminarı çərçivəsində keçirilirdi. Seminarın əsas mövzusu: "Bəkir Çobanzadə fenomeni və türk dünyası" idi. Tədbir çərçivəsində Krım Respublikasının elmi kitabxanasının açılışı, akademik Bəkir Çobanzadənin heykəlinin açılışı və onun adına təsis olunmuş mükafatların təqdimat mərasimi keçirildi.

Tədbirdə Azərbaycan, Özbəkistan, Qazaxıstan, Tacikistan, Türkiyə və s, dövlətlərin nümayəndələri iştirak edirdilər. Bizim nümayəndəlik Azərbaycanın tarix, ədəbiyyat, coğrafiya, turizm sahələrini əhatə edən kitab kolleksiyasını Krım Respublikasının Elmi Kitabxanasına hədiyyə etdi.

Azərbaycan Respublikasının İşlər İdarəsinin Prezident Kitabxanasının aparıcı məsləhətçi və şöbə müdiri Zakir İsmayılov Bəkir Çobanzadə haqqında məruzə etdi. Bu məruzədə akademikin Azərbaycanda yaşadığı dövr geniş işıqlanmış və onun Azərbaycan dilinin inkişafı sahəsində xidmətlərindən söhbət açıldı. Tədbirin sonunda Bəkir Çobanzadə adına mükafatlar paylandı və böyük konsert proqramı nümayiş edildi.

Konfrans iştirakçıları üçün nəzərdə tutulmuş mədəni proqramda maraqlı və rəngarəng idi. Bura Krım Respublikasının şəhərləri və gözəl təbiətilə tanışlıq səyahətləri və ekskursiyalar daxil edilmışdi.

Qeyd etmək lazımdır ki, konfrans çox yüksək səviyyədə təşkil olunmuşdu və iştirakçıların rahat işləmələri və istirahətləri üçün hər bir şərait yaradılmışdı.

Əminəm ki, konfransda iştirak edən bütün Azərbaycan kitabxanaçıları uzaq Krımdan vətənə əliboş qayıtmayıb, əldə etdiyi bilik və bacarıqlarını öz kitabxanalarında gündəlik işlərində daha böyük səylə tətbiq edəcək və həmkarları ilə bu bilikləri həvəslə bölüşəcəklər.